Musulmonlar

Вақт ва фурсатни ғанимат билиш

Аллоҳ таоло Аср сурасида ўтиб бораётган вақт жуда муҳим эканига ишорат қилган ҳолда, ўша сурани вақт ўтишига қасам билан бошлади. Бу – вақт ва фурсат жуда ҳам катта аҳамиятга эга ва охиратда (агар вақт ва фурсатдан ўз ўрнида фойдаланиб қолинмаса) жавобгарликка тортилиши мумкин бўлган – буюк бир неъмат эканига далолат қилади.

Севимли Пайғамбаримиз алайҳиссалом мавзуга алоқадор шундай деган:

“Қиёмат куни ҳеч бир қул умрини нимага сарфлаб тугатганидан, илми билан нима ишлар қилганидан, мол-давлатини қаердан топиб қаерга сарфляганидан, вужудини нима ишда қаритганидан ҳисобот бермай туриб турган еридан қимирлай олмайди.” (Термизий, Қиёмат 1)

Яна бир ҳадисда шундай дейилган:

“Беш нарса келмай туриб беш нарсани ғанимат бил:
1. Кексаликдан олдин ёшликни,
2. Бетобликдан олдин саломатликни,
3. Фақирликдан олдин бойликни,
4. Банд бўлиб қолишдан олдин бўш вақтни ва
5. Ўлимдан олдин тирикликни (ғанимат бил)!” (Бухорий, Риқоқ 3; Термизий, Зуҳд 25)

Маҳшарда ҳар кимга ўзининг тириклигида қилиб ўтган ишлари ёзиб қўйилган китоби қўлига берилади ва унга: “Китобингни ўқи…!”-дейилади (Исро сураси 14-оят). Ана ўшанда қўлимиздаги китобни очиб ўқиётганимизда, Аллоҳнинг китобини ўқиб, уқиб, ўрганиб, ўргатиб, ўзимиз ҳам амал қилиб, бошқаларга ҳам тарғиб қилиб юрганимиз амал дафтаримизнинг энг кўп қисмини эгаллаганини кўриш менимча ҳар биримизнинг асосий орзуимиздир. Аллоҳга очиқ юз билан бормоқчи бўлган мўминларга бундан ҳам каттароқ бахт бўладими?
Хулоса қилиб шуни айтмоқчиманки, азиз биродарларим! Айнан шу кунларда Аллоҳни имтиҳони (тўғрисини Аллоҳ билади) бўлиб турган бир вақтда, уйларимизда барча ишлардан фориғ бўлиб ўтирибмиз. Фурсатдан фойдаланиб Аллоҳнинг китобини ҳеч бўлмаса мана шу кунларда бир марта бўлса ҳам ўз она тилимизда тушуниб ўқиб ундаги Аллоҳнинг бизга юборган мактубларидан хабардор бўлиб қолайлик, бу ишга ғайрат билан ёндашайлик. Фурсатни ғанимат билайлик азизлар. Бу бўш вақтлар ва имкониятлардан албатта ҳисоб берамиз (Такасур сураси 8-оят).

Телеграм каналимиз: