Musulmonlar

Ел таҳоратни бузадими?

 Савол: Ел таҳоратни бузадими?

Жавоб: Ҳа, албатта бузади. Моида сураси 6- оятдаги Аллоҳни кўрсатмасига кўра, ҳожатдан келган киши албатта намоз учун таҳорат олиши шарт. Таҳорат олмасдан намозга туриш Аллоҳни амрига итоатсизлик ҳисобланади. Ел келиши ҳам таҳоратхонага алоқадор ишлардан ҳисобланиб, у киши ҳам намоз учун албатта таҳорат олиши керак. Таҳоратни бузувчи нарсалар ҳақида мазҳаблар орасида ихтилофлар бор. лекин, биз ихтилофи бўлмаган, китоб ва суннатдан далили бўлган қисмларини айтиб ўтамиз. Моида сурасининг 6- оятидаги «ғоит» калимаси ҳожатини чиқарадиган аъзодан киноядир. Демак, ўша аъзоларнинг биронтасидан нимаики чиқса таҳорат бузилади.

Олди ва орқа томондан чиққан ҳар қандай нарса таҳоратни бузади. Орқадан келган нарса хоҳ оғири бўлсин хоҳ ел, олдидан келгани хоҳ бавл бўлсин хоҳ мазий ёки вадий бўлсин бу нарсалардан қайси бири олд ёки орқа томондан чиқадиган бўлса, ҳар ҳолатда таҳорат бузилади. Уйқуга толган киши орқадан ел келганини, ёки олдидан бавл ёки вадий келганини фарқига бормайдиган даражада қаттиқ ухлаб қолган бўлса ҳам турганидан кейин таҳорат олиши керак. Аслида, уйқуни ўзи таҳоратни бузмайди.

Бухорий ва Муслим ривоят қилган икки ҳадисга кўра, Ибн Тамиймни амакиси Расулуллоҳга ўзини намоздаги хавотиридан шикоят қилади, шунда Расулуллоҳ алайҳиссалом унга: «Токи (елни) овозини эшитмагунингча ёки ҳиди келмагунича намозингдан айрилма» – деб буюрган экан. Бу ҳодиса бошқа бир ҳадисда ҳам айнан мана шу ҳукмни ифодалаган ҳолда келтирилган.

Намозда овоз чиқариб юборган кишини таҳорати бузилади деб келтирилган ҳадис жуда ҳам заиф ҳисобланади. Ҳазрати Алига (Унга Аллоҳни розилигини сўраймиз) нисбат берилиб келтирилган «оғзини тўлдириб қусиш таҳоратни бузади» деган гап эса ёлғон ҳадис. У ҳазрати Алига қилинган ифтиродир.

Олд томондан шаҳват ва эҳтироссиз оқиб чиққан ҳар қандай суюқлик таҳоратни бузади. Шаҳват билан чиққани эса ғуслни бузади.