Musulmonlar
«Мен Мусулмонман! » дейиш етмайдими?

«Мен Мусулмонман! » дейиш етмайдими?

Савол: Намозхон инсонларнинг кўпчилиги, ўзларини турли номлар (салафий, ҳизбий, жундий, шофеий, сўфий, ашъарий, шиий, мавлавий ва.ҳк.) билан номлаб, ўша ном билан фахрланади ва ўша ном остидаги диний ташкилот ва жамоаларни кенгайтиришга ва тарафдор йиғишга уринишади. Аллоҳ ўз китобида бу ҳақда хабар берганми? Ислом динига мансуб кишиларга хос бир исм борми Қуръонда?

Жавоб: Ҳа, албатта хабар берган. Аллоҳ таоло Ўз Китобида Аллоҳга ич-ичидан ишониб суянган ва яхши ишлар билан машғул бўлган инсонларга жуда ҳам чиройли ном бериб, уларни Қуръонда ҳам ва аввалги китобларда ҳам “Мусулмонлар” деб атаган. Мусулмонман деган бир инсон учун бундан бошқа номни ёки лақабни ўзига нисбат бериши мумкин эмас. Дин нуқтаи назаридан Аллоҳ номлаган ном билан кифоялансин. Шунда Мусулмонларни бир-биридан айриб-бўлиб, фирқа-фирқа қилиб, бир-бирига душман қилиб қўёлмайдилар. Аллоҳ таоло шундай марҳамат қилади:

يَا أَيُّهَا الَّذِينَ آمَنُواْ اتَّقُواْ اللّهَ حَقَّ تُقَاتِهِ وَلاَ تَمُوتُنَّ إِلاَّ وَأَنتُم مُّسْلِمُونَ

“Эй мўминлар, Аллоҳга муносиб равишда тақво қилинглар ва сўнги нафасингизгача мусулмон бўлиб қолинглар!» (Оли Имрон 3/102)

وَجَاهِدُوا فِي اللَّهِ حَقَّ جِهَادِهِ هُوَ اجْتَبَاكُمْ وَمَا جَعَلَ عَلَيْكُمْ فِي الدِّينِ مِنْ حَرَجٍ مِّلَّةَ أَبِيكُمْ إِبْرَاهِيمَ هُوَ سَمَّاكُمُ الْمُسْلِمينَ مِن قَبْلُ وَفِي هَذَا لِيَكُونَ الرَّسُولُ شَهِيدًا عَلَيْكُمْ وَتَكُونُوا شُهَدَاء عَلَى النَّاسِ فَأَقِيمُوا الصَّلَاةَ وَآتُوا الزَّكَاةَ وَاعْتَصِمُوا بِاللَّهِ هُوَ مَوْلَاكُمْ فَنِعْمَ الْمَوْلَى وَنِعْمَ النَّصِيرُ

“Аллоҳ йўлидаги қўлдан келганча фидокорлик қилинглар. Сизларга имконият берган Удир. Бу динда сизларга ҳеч қандай оғир иш таклиф қилмади. Бу – Отангиз Иброҳимнинг динидир. Элчиси сизларга ўрнак бўлиши ва сизлар ҳам инсонларга ўрнак бўлишларинг учун Аллоҳ сизларни бу ва бундан аввалги китобларда “Мусулмонлар” деб номлади.  Намозни тўлиқ адо этинглар, закотни беринглар ва Аллоҳга ёпишинглар. У сизларни Эгангиздир. У қандай яхши Эга ва қандай яхши Ёрдамчидир.” (Ҳаж 22/78)

Ҳар қандай ўзини мусулмон деб билган киши, дини Ислом бўлгани учун, ўзига мусулмон деган номдан бошқа диний номни муносиб кўрмаслиги керак. Мусулмонликдан мақсад; инсон бўлиб туғилган ҳар ким инсонликча яшаб ўтиши ва ўз яратилиш фитратини – табиатини бузмай яшашидир. Дин бу фитратдир, асл яратилишдаги табиатидир.