Илк инсоният биздан илмли бўлган
Бисмиллаҳир-роҳманир-роҳим.
Маълумки, оламларни Аллоҳ яратган ва инсониятга огоҳлантирувчи, йўл кўрсатувчи қилиб Ўзининг муборак сўзларини Пайғамбарлар орқали юбориб турган. Қуръон эса энг сўнги Каломуллоҳдир. Бунга кўра, борлиқ ҳам Қуръон ҳам Аллоҳнинг фарқли оятларидир. Яъни, борлиқ яратилган, Қуръон эса нозил қилинган оятлардир. Иккаласининг ҳам Эгаси Ягона зот бўлгани учун, улар ўртасида зиддият бўлмайди. Демак, бу дунё тарихи ҳам яратилиши ҳақидаги энг тўғри хабарни бизга Унинг Эгаси бўлган Аллоҳ билдиради. Аллоҳ Бақара сураси 29-30-оятларида ерда халифа – Одамнинг яратилишини айтиб, «Мен сизлар билмайдиган нарсани биламан!» деган бўлса, Алақ сураси 4-оятда: «У (инсониятга) ёзув-чизувни ўргатди», деган Бақара сураси31-оятда эса: «Унга (Одамга) барча нарсанинг номланишини ўргатди», деб, оламлар ичра инсониятнинг фарқли ва устун жиҳатларини айтиб ўтган.
Демак, одам яратилишидан жоҳил бўлмаган, тошлардан найза-қилич ясаб, ғорларда яшамаган. У ёзиш ва чизишни билган. Демакки, Одам алайҳиссалом бугунги олимлар билмаган илмларни, яъни ҳар бир нарсанинг моддаси, нимага ишлатилиши ва хусусиятини билган.
Одам алайҳиссаломдан кейин Қуръонда ибрат учун Нуҳ пайғамбар қавми ҳам тилга олинади. Нуҳ пайғамбар ўз қавмига хитобан айтган гапларини бизга Аллоҳ Қуръонда шундай билдиради: «Аллоҳ етти осмонни қандай қилиб, бир-бирига мос яратганини кўрмадингизми?! У (Аллоҳ) осмонлар ичра ойни (ер учун) нур, қуёшни эса чироқ қилди», – деб буюради (Нуҳ сураси 15-16-оятлар).
Бундан чиқадиган хулоса шуки, Нуҳ қавми астрономия илмини чуқур билган. Аллоҳ «кўрмадингизми?» деб хитоб қилишига кўра, балки бутун коинотни кезиб чиққан бўлиши, яъни космик учиш аппаратлари ҳам яратган бўлиши мумкин.
Нуҳ пайғамбар қавмидан кейин Қуръонда Лут, Од ва Самуд қавми ҳақида хабар берилади. Аллоҳ Қуръонда Од қавмини «Эрам шаҳрининг эгалари» дейди ва Од ҳамда Самуд қавми ҳақида айтар экан, Фажр сураси 7-13-оятларда: «Роббинг Од халқини нима қилганини билмадингми?! Од халқига Ҳуд алайҳиссалом пайғамбар қилиб юборилган. Баланд устунлик Эрамни. У шаҳарлар ичра ўхшаши барпо қилинмаган (шаҳар)дир. Водийдаги қояларни кесган Самуд халқини (Роббинг нима қилди)?! Бу халққа ҳазрати Солиҳ пайғамбар элчи қилиб юборилган. Тоғдек бинолари (пирамидалари) бор Фиръавнни ҳам (нима қилди)?! Улар юртларида зўравонлик қилишган. У ерларда кўплаб бузғунчиликлар қилишган. Оқибатда Роббинг улар тепасига турли азоб ёғдирди», – дейди.
Самуд қавмига Ҳижр сураси 82-оятда: «Хотиржам бўлиш учун улар тоғларни ўйиб, уйлар қуришар эди», – деб таъриф беради. Тоғларда уйлар қуриш учун билим, заковат ва технология керак. Бу қавмлар бугунги одамлардан анча илмли бўлиб, бугунгача жуда ривожланган цивилизация бўлган.
Ушбу қавмларни ҳалок қилганини Аллоҳ Фуссилат сураси 15-16-оятларида, Худ сурасининг 67-68-оятларида келтиради. Нима учун бу қавмларни Аллоҳ йўқ қилди? Сабаби, улар илм ва тараққиёт ҳамда цивилизациядан фахрланиб, ўзларини кучли ҳис қилиб, Аллоҳнинг ҳукмларидан бош тортишди.
Аллоҳ ушбу мавзуда Аҳқоф сураси 26-оятда бутун мусулмонларни огоҳлантириб: «Шубҳасизки, уларга сиз (Маккалик)ларга бермаган имконият берганмиз. Уларга ҳам қулоқ, кўзлар ва виждонлар берганмиз. Бироқ уларнинг қулоқлари, кўзлари ва виждонлари ҳеч нарсага асқатмади. Чунки улар Аллоҳнинг оятларини қасддан инкор қилишар эди. Масхара қилган нарсалари ўзларини ўраб олди», – дейди.
Ва Аллоҳ Анъом сураси 6-оятда Қуръонни инкор қилувчиларга қарата: «Улардан аввал қанчадан-қанча наслларни ҳалок қилганимизни кўрмадиларми?! Бу заминда сизларга бермаган имкониятларни уларга берганмиз, уларни тепасига серёмғир булутлар юборганмиз ва остларидан анҳорлар оқиб турадиган қилиб қўйганмиз. Сўнгра гуноҳлари сабабли уларни ҳалок қилиб, улардан кейин бошқа насл пайдо қилдик», – деб буюради.
Муъминун сураси 21-оят билан эса бутун инсониятга қарата: «Ўзларидан аввалгиларнинг оқибати қандай бўлганини кўриш учун наҳот ер юзида сайр қилмаган бўлсалар?! Улар булардан куч-қувватда ҳам, ер юзида из қолдиришда ҳам кучли бўлишган. Шундай бўлса-да, гуноҳлари сабабли Аллоҳ уларни жазога тутди. Уларни Аллоҳ (азоби)дан сақлаб қоладиган ҳеч ким бўлмаган», – деб буюради.
Бу ерда Аллоҳ юқоридаги қавмларни «сизлардан анча кучли эдилар ва ер юзида из қолдиришда ҳам кучли эдилар», – дейди. Бугунги кунда пирамидалар, тоғлардаги баланд бинолар ўша қавмлардан қолган издир ва бугунги инсоният ер юзида ҳали бунақанги из қолдирмади, ҳатто ўша биноларни қандай қилиб қурганини ҳалигача аниқлай олмади.
Аллоҳ Қуръонда «Сиз ҳам босқичма-босқич тараққий қиласизлар», – деб башорат беради. Аммо тараққиёт Аллоҳ амрларини бажариш билан бирга бўлсагина натижа беришини юқоридаги оятлар билан эслатиб ўтади. Акс ҳолда бу Қуръонга қарши ҳолатдир.
Афсуски, мусулмонлар бу оятларни ўқимайди, Ислом душманлари эса билсалар ҳам яширади. Бугунги кунда архитектор олимлар очган Сумерлар давридаги (эрамиздан 2500-3000 йил олдин яшаган) чизмаларида Нуҳ алайҳиссалом кемаларининг чизмалари борлиги, ер юзининг айрим қисмларини сув босганлиги тафсилотлари айтилмоқда. Буларнинг барчаси Қуръоннинг Аллоҳ каломи эканлигига ва ҳар қандай инкор Қуръонни инкор қилиш маъносига келади.
Аллоҳ тўғри йўлдан адаштирмасин.
