Савол:
Ассалому алайкум. Мени саволим шуки, агар бир инсонни отаси намоз ўқимаса, ҳатто ёши улуғ бўлиб кетгунча ҳам Аллоҳга ибодат қилмаса,фарзанди отасига Аллоҳга ибодат қилмаслик қаттиқ гуноҳ эканлигини тушунтирса бўладими? Отага гапирилмайди, фақат дуо қилинади,дейилади. лекин, отасини умри ўтиб боряпти, қиёмат куни келганда умри намозсиз ўтган отадан қандай Аллоҳга жавоб беради, деб хавотирланиб отасига тушунтирса бўладими ёки отага бундай гап гапириш гуноҳми? Уларни дили
оғрийдими? Фақат дуо қилинади, деяпти. (Савол қисқартирилган.)
Жавоб:
Ва алайкум ассалом. Ота-оналар ҳақига албатта дуо қилинади. Шу билан бирга, инсон аввало ўз яқинларини ёмонлик ва фалокатдан сақлаб қолишга ҳаракат қилиши керак. Шунинг учун, имон-эътиқод масалаларида ҳам аввало ўз яқинларимиз, ота-оналаримиз, ака-укаларимиз, опа-сингил ва қариндош-уруғларимизга Аллоҳни, мусулмонлик ва ундаги амалларни ўргатишимиз керак. Отасини мулойимлик ва ҳикмат йўли билан ҳаққа даъват қилишда бизга энг гўзал ўрнак Иброҳим алайҳиссаломдир. Агар отангизга ўзингиз гапира олмасангиз, Исломни ўргатадиган китоб совға қилинг, агар китобни ўқимаса, аудио ёки видео даъватлар эшитишга жалб қилиб, ёки ўзингиз таниган бирон бир олим инсонга айтинг, отангизга даъват қилсин, тушунтирсин. Нима қилиб бўлса ҳам, яқинларимизни Исломга, амалга чақиришимиз керак.
Сизга ота-она ҳақидаги Бақара сураси 215, Исро сураси 23-25 оятларларни ўқиб чиқишни тавсия қиламиз.
Ота-оналаримизни гуноҳ ва маъсиятга буюрган буйруқларидан бошқа ҳар бир айтганини бажаришимиз, уларга энг чиройли ҳолатда муомала қилиб, хизматларини бажо қилишимиз керак. Ҳақларига кўп дуо қилишимиз керак.
