Musulmonlar

Таҳажжуд намози қачон ўқилади?

Савол: Таҳажжуд намози қачон ва қандай ўқилади? Агар тўрт ракаат ўқилса ташаҳҳутда фақат таҳийёт ўқиладими ёки солли-борик дуолар ҳам ўқиладими?

Жавоб: Хуфтон намозидан кейин бир муддат ухлаб туриб ўқилган ҳар қандай тунги намозга “таҳажжуд намози” дейилади. Чунки Таҳажжуд – кечаси уйқудан намоз учун туриш дегани. Субҳ содиқ, яъни тонг шафақлари бирлашишдан аввалги ўқилган намозлар таҳажжуд намозига киради. Ундан кейин бамдод намозини вақти киради.

Исро сурасининг 79- ояти далолат қилишича, таҳажжуд намози фақатгина Пайғамбар алайҳиссалом учун фарз, қолган мўминлар учун эса “суннати муаккада”, яъни Пайғамбар алайҳиссалом тарафидан қаттиқ таъкидланган суннат экани маълум бўлади. Барча мўминларга фарз қилинган эса кундалик беш вақт намоздир ва бу нарса оятлар билан собитдир.

Пайғамбаримиз “Фарз намозидан кейин энг фазилатли намоз кеча намозидир.” (Муслим Сиям, 202, (1163,) 203) дея мана шу ҳақиқатга ишорат қилганлар.

Жуда ҳам кўп фазилатга эга бўлган бу намоз, биздан аввалги солиҳ қуллар адо этиб келган, Аллоҳни розилигига яқинлашишга васила бўлган, гуноҳларни тўсган ва гуноҳларга монеъ бўлган бир ибодатдир. (Қаранг: Термизий, Даавот 115)

Таҳажжуд намози ҳам бошқа нофила/суннат намозлар билан бир хил ўқилади. Фақат қироат масаласида ихтиёрий бўлиб, хоҳласа овозини чиқариб, хоҳласа ичида ўқийди.

Агар таҳажжуд намозини икки ракаатдан кўпроқ ўқимоқчи бўлса, ҳар икки ракаатда салом бериб янгидан намоз бошлаши тавсия қилинади. Агар бирданига тўрт ракаат ўқимоқчи бўлса, биринчи ташаҳҳутда фақатгина таҳийёт ўқийди, Аллоҳумма солли дуоларини ўқимайди.

Таҳажжуд намознинг фазилати ҳақида билиш учун қуйидаги мақолани ўқишни тавсия қиламиз:

Таҳажжуд намознинг фазилати