Musulmonlar

Ҳарбийларга намоз учун шароит йўқ, нима қилишим керак

Ассалому Алайкум мен кўп йиллардан бери ҳарбий хизматдаман. Биз ҳарбийларга намоз ўқиш учун шароит яратилмаган. Намоз мусулмонларга ўз вақтида фарз қилинган. Мен анчадан бери иложи борича намозларни вақтида ўқишга ҳаракат қиламан. Жума намозларига хам хар доим бора олмайман!?Намозларим кўпинча қазо бўлиб колябди. Мени ҳукмим қандай?

Ва алайкум ассалом. Ҳаётда энг шарафли ва масъулиятли хизматлардан бирини танлабсиз, бу қаҳрамонликдир. Аллоҳ қабул қилсин.

Намозга шароит яратилиш масаласига келсак, намоз ўқимоқчи бўлсангиз, шароит бўлиши шарт эмас. Намоз учун бет-қўлингизни ювгани ҳамда бошингиз ва оёғингизга масх тортгани етадиган сув бўлса бас. Ҳатто сув топилмаса, кафтингизни тоза бир қуруқ нарсага уриб, шу ҳолатда юзингиз ва икки қўлингизни силаб таяммум қилишингиз таҳорат ўрнига ўтади. Демак, сув топилса таҳорат билан, топилмаса таяммум билан намоз ўқисангиз бўлади. Бу ҳукм Қуръони Каримда Нисо сураси 43 ва Моида сураси 6-оятларда баён қилинган.

Намозхона масаласига келсак, агар намозхона бўлмаса, хоҳлаган жойингизда ўқиб олишингиз мумкин. Намоз учун албатта намозхона ёки масжид бўлиши шарт эмас.

Агар хизмат вақтида намоз ўқишга рухсат бўлмаса, тушлик вақтида бира-тўла ҳам пешин ҳамда аср намозларини қўшиб олсангиз ҳам бўлади. Олти саҳиҳ тўплаб асарда бунга далил бўладиган ўнлар-ча ҳадис бор.

Агар, бундай қилишга ҳам имкон бўлмаса, яъни, тушлик вақтида ҳам пешин ҳамда аср намозларини қўшиб ўқишга ҳам имкон бўлмаса, хизмат вақтида юриб кетаётган ёки бирон бир улов устида миниб кетаётган ҳолатда намозда ўқиладиган сура ва тасбеҳларни ўқиб, намозни адо қилишингиз мумкин. Имкон бўлган ҳолатларда келгуси намозларни яна барча арконлари билан ўқишда давом этаверасиз. Бу ҳукмлар Қуръони Каримда Бақара сурасининг 239-оятида келтирлиган.

Ўтмишда ўқий олмаган намозларингизнинг қазосига келсак, улар учун Аллоҳдан кечирим сўрашингиз ва қайтиб намозларни қазо қилмасликка ҳаракат қилишингиз кифоя.

Агар мана шу шаклда намозларни адо қилиб борсангиз, Ислом динига кўра, сизни ватан ҳимоячиси бўлмиш бир мусулмон деб аталади.

Изоҳ қўшиш

Телеграм каналимиз: