Савол:
Ассалому алайкум. Мен узоқ вақтли танаффусдан сўнг ибодатларда бардавом бўлишни бошладим. Сўрамоқчи бўлганим; ўша жоҳилият пайтимдаги ўртоқ ва биродарларим бор. Улардаги ҳолатни яхши ҳис қиламан, деб ўйлайман. Уларга маслаҳатлар беришим (насиҳат, мавъизалар қилишим) қанчалик тўғри? Шу жабҳада илмим етарлими? Ёки бошқа олимроқ кишиларга йўналтирайми? Лекин улар менга очилган каби бошқаларга очилишлари қийин. Олимлардан яқинлари бўлса, иш менгача қолмасди. Нима дейсиз шунга?
Жавоб:
Ва алейкум ассалом. Энг таъсирли ва энг тўғри насиҳат Аллоҳнинг насиҳати, яъни Қуръондир. Демак, Қуръондаги яхшиларга ваъда қилинган мукофотлар ҳамда ёмонларга таҳдид қилинган жазолар ҳақидаги оятларни айтиб беринг. Сени яратган Аллоҳга ва охиратда Аллоҳга жавоб беришга иймон келтирган бўлсанг ёмонликка сабабчи бўладиган ишлардан тийил, ризқни кенг қиладиган ҳам тор қиладиган ҳам Аллоҳ (Рад 13:26, Исро 17:30), деб насиҳат қилинг.
Аллоҳ тавба қилганларнинг барча гуноҳларини савобга ўгириб қўяркан (Фурқон 25:70) ва У тавбакорларни яхси кўраркан (Бақара 2:222) деб тавбага тарғиб қилаверинг. Тавбага ўтган инсоннинг гапи жуда таъсирли бўлади. Зеро, дўстларизни даъват қилиш бегона олимларни эмас, айнан сизни зиммангиздаги вазифадир. Етказиш сиздан, ҳидоят Аллоҳдан.
