Тошланган шайтоннинг шарридан Раҳмон ва Раҳим Аллоҳга сиғинаман.
Бизга ёшлигимиздан “Дини Исломда 4 та китоб; Забур – Довуд пайғамбарга, Таврот – Мусо пайғамбарга, Инжил – Исо пайғамбарга ва Қуръон – Муҳаммад пайғамбарга юборилган 4 та китоб, қолган пайғамбарларга китоб юборилмаган, балки, 3-4 варқодан иборат саҳифалар юборилган, деб ўқитиб келинган. Ушбу мавзу Қуръон оятлари билан изоҳланганда бу маълумотнинг бироз янглишлигини кўриш мумкин. Аввало Аллоҳ Қуръонда барча пайғамбарларга китоб юборганини Анъом сураси 89 оятда: “Булар – Биз уларга китоб, ҳикмат ва Пайғамбарлик берган кишилардир. Агар у (кофир)лар буларни инкор қилса, ўрнига буларни инкор қилмайдиган қавмни вакил қилиб келтириб қўямиз”, деб билдиради. Анъом сураси 84-86- оятларда Иброҳим (а.с.)дан то Исо (а.с.)гача 18 та пайғамбар номини келтириб, 87–оятда: “Уларнинг ота-боболаридан, зурриётларидан ва ака-укаларидан ҳам уларни танлаб олдик ва уларни ҳам тўғри йўлга солганмиз…” дея бу пайғамбарларнинг зурриётларидан ҳам пайғамбарлар танлаганини ҳамда уларга ҳам китоб юборилганлигини айтади. Ундан ташқари, БАқара сурасининг 136-оятида шундай буюрилган:
“(Эй мўминлар!) «Аллоҳга ишондик, бизга юборилган Китобга ҳам, Иброҳимга, Исмоилга, Исъҳоққа, Яъқубга ва унинг набираларига юборилган китобларга ҳам, Мусога ва Исога берилган китобларга ҳам, (булардан бошқа) пайғамбарларга Робби тарафидан берилган китобларга ҳам ишондик. Улар орасидан ҳеч бирини ажратмаймиз. Биз у (Аллоҳга) таслим бўлувчимиз», денглар.”
Шу ўринда Таврот хақиқатдан ҳам Мусога юборилган бир дона китобми деган саволга жавобни Қуръон оятларидан қидириб кўрамиз. Қуръоннинг бирорта ҳам оятида: “Мусога Таврот номли китоб бердик”, дейилмаган. балки, “Мусога китоб бердик”, деган мазмунда умумий маълумот берилган. Хусусан, Исро сураси 2-оятда: “Биз Мусога Китоб берганмиз ва Мен билан ўзлари орасига ҳеч қандай вакил қўймасин деб, Китобни Исроил авлоди учун қўлланма-раҳнамо қилиб берганмиз”, Бақара сураси 53-оят; “Ўшанда тўғри йўлга келасиз деб Мусога китоб–фурқон берганмиз” дейди. Домла Баҳром Бакиров Фурқон калимаси борасида: “Китоб – Мусога берилган Забурнинг яна бир номи, Фурқон – ўша Китобнинг сифати. Фурқон – тўғрини хатодан ажратиб бериш, ажрата олиш дегани. Илоҳий Китобларнинг барчаси мана шу хусусиятга эгадир”, дея таъриф берадилар. Демак Илоҳий китобларнинг барчаси Фурқон сифатига эгадир. Забур ҳам фақат Довуд алайҳис-саломга юборилган ягона китоб бўлмасдан, барча Илоҳий китобларнинг сифатидир. Оятларни давом эттирадиган бўлсак, Ҳуд сураси 110–оят: “Шубҳасизки, Мусога Китоб берганмиз, у ҳақида (ҳам) ихтилоф қилинди. Агар Яратган Эгангнинг аввалги сўзи бўлмаганида, улар орасида албатта ҳукм ижро этилган бўларди. Улар у китоб ҳақида иккилантирувчи шубҳададир”, Анбиё сураси 48–оят: “Шубҳасизки, Мусо билан Ҳорунга ҳақ билан ноҳақни ажратиб берадиган (Китоб)ни – масъулиятли (мўмин)ларга (йўлини) ёритиб берадиган ва эслатма-насиҳат қилиб бердик” дейди. Шунингдек, Мусо пайғамбарга китоб берилганлиги тўғрисидаги оятлар Фурқон сураси 35, Қасос сураси 43, Муъмин сураси 53, Аҳқоф сураси 12 ва Фуссилат сураси 45-оятларда келадию, биронтасида Мусога Таврот бердик деган шаклда келмайди.
Қуръонда Таврот калимаси Оли Имрон 3, 48, 50, 65, 93, Моида 43, 44, 46, 66, 68, 110, Аъроф 157, Фотиҳ 29, Соф 6, Жума 5-оятларда келади, аммо Мусогагина туширилди деб келмайди. Шунга кўра, Таврот Мусогагина туширилган китоб эмас, балки Таврот Исроил ўғилларига юборилган барча пайғамбарларга туширилган барча Илоҳий китобларнинг ўртоқ номидир. Шу ўринда, Довуд алайҳис-саломга берилган Забур ҳам, Исо пайғамбарга юборилган Инжил ҳам Тавротнинг бир бўлими ҳисобланади. Бу мавзу бугунги кундаги мавжуд Таврот деб аталувчи китобни тадқиқ қилган баъзи Ислом олимларининг (Яҳё Шенол) илмий тадқиқотларида ҳам ўз аксини топган. Ушбу тадқиқотга кўра, Таврот Мусо алайҳис-саломга юбороилган 5 китобни ўз ичига олган ва асл 39 китобдан иборат китоблар жамламасидир. Бироқ, улардан айрим оятларини яҳудийлар орасидаги хоинлари яширган, ўзгартирган ва маъноларини бузиб, бошқа нусхага кўчирган бўлиши ҳам мумкин. чунки, бу ҳақида қуръонда баён қилинган. Мусо алайҳис-саломга юборилган 5 китоб бугунги кунда: “Яратилиш”, “Мисрдан чиқиш”, “Лэвилилар”, “Саҳродаги саноқ” ва “Қонуннинг такрори” деб номланувчи ушбу 5 китоб ва Мусо алайҳис-салом вафот этгандан сўнгра Исроил ўғилларига юборилган барча пайғамбарларга (Закариё, Яҳё, Яқуб, Юсуф, Сулаймон, Довуд) юборилган китобларнинг барчаси Тавротнинг қисмларидир. Яҳудийлар Инжил ва Қуръонга ишонмаганидек, Тавротни 3 қисмга бўладилар. Биринчи қисм Мусо пайғамбарга туширилган илк 5 китобга “Қонун китоби” (Тора) дейилади, Мусо алайҳис-саломнинг ўлимидан кейин туширилган китобларга “Китоблар” деб ном беришган ва учинчиси “Набийлар китоби”дир.
Аллоҳ бизга Қуръонда барча пайғамбарларга ва китобларга имон келтириш амрини берган экан, биз Аллоҳ туширган китоблар ва барча пайғамбарларга иймон келтирамиз. Фақат биз бу ерда Таврот Мусогагина берилган бир дона китоб деган тушунтиришларнинг Қуръонга кўра бироз янглишлигини айтмоқчимиз холос.
Бундан шу нарса маълум бўладики, бизга Аллоҳнинг китоблари ҳақидаги умумий маълумотлар нотўғри берилган бўлса, ундаги ҳукмлар қай даражада яширилгани, маънолари бузилганини ва унга қанчалик душманчилик қилингани ҳақида тасаввур ҳам қилиш қийин.
Ўз вақтида кўзимизни очмасак, Қуръонга қайтмасак, аввалги умматлар фитна ва алдовга гирифтор бўлиб, кейин ундан қутула олмаётган ҳолатлари бу уммат бошига ҳам тушиши тайин.
Телеграм каналимиз:
