Савол:
Совуқ кунларда ғуслни ўрнига таяммум қилиб олсам бўладими?
Жавоб:
Сафарда эканингиз сабабли ёки бемор бўлсангиз, ёҳуд бемор бўлиб қолиш хавфи бўлса, мана шу ҳолатда ғусл қилмасдан таяммум қилиб юрсангиз бўлади. Чунки Аллоҳ таоло Моида сурасининг 6-оятида бунга рухсат бериб қўйган ва Ҳаж сурасининг 78-оятида Аллоҳ сизларга динда ҳеч қандай машаққат пайдо қилмади, деб марҳамат қилган.
Демак, кунлар совуқ бўлиб, ғуслдан кейин қуринишни иложиси бўлмаса, ёки уй совуқ бўлса, ёки иссиқ сув топилмаса, ёки уй иссиқ бўлгани билан сочни қуритишни имкони бўлмаса ва шу сабабли шамоллаб бемор бўлиб қолиши эҳтимоли юқори бўлса, бундай ҳолатларда Аллоҳ таоло таяммум қилишга рухсат берган.
Таяммум қилиш учун албатта касал бўлиш шарт эмас, касал бўлиб қолиши хавфи бўлган ҳар қандай ҳолатда ўзини эҳтиёт қилиб таяммум қилиб юрса кифоя қилади.
Таяммум қилишдан олдин агар баданида нажосат қолдиғи бўлса, уни имкон қадар сув ёки нам салфетка билан тозалаб ташланади, сўнг покиза тупроққа ёки устки қатламида ғубори бўлган бирор нарсага иккала қўлининг кафти билан уриб, иккала кафти билан юзини артади, ва яна иккала кафти билан қайтадан уриб, кейинги сафар иккала қўлини артади. Мана шундай енгиллик қилиб Аллоҳ бизга жуда катта неъмат ато этган.
“Аллоҳ сизларга қулайлик бўлишини хоҳлайди, қийинчилик бўлишини хоҳламайди…” (Бақара 2:185).
“Аллоҳ сизларга бирон бир машаққат бўлишини хоҳламайди. Лекин, У сизларни поклашни, неъматини тамомлаб беришни хоҳлайдики, зора шукр қилсангиз.” (Моида 5:6)
