Musulmonlar
Мусулмонни лаънатласа бўладими?

Мусулмонни лаънатласа бўладими?

Савол: Лаънат нима дегани? Мусулмон мусулмонни лаънатласа бўладими?

Жавоб: Аллоҳ таолони бандаларига бўлган лаънати – охиратда азобга гирифтор бўлиш, дунёда эса Аллоҳнинг раҳмати ва ёрдамидан маҳрум бўлиш дегани. Бир инсондан бошқа бир инсонга қилинган лаънат – бад дуодир, қарғишдир[1].

Қуръони Каримда Аллоҳ тарафидан қилинган лаънат, асосан, Аллоҳга қилган дуо ва ибодатларида Унга шерик қўшадиган – мушрикларга, Аллоҳга ишонмаган кофирларга, яҳудий ва насроний динига мансуб бўлса-да, ҳақ ва ҳақиқатни тан олмай, ўзларига юборилган пайғамбарга душманлик қилган кофирларга, тоғутга ибодат қилиб сиғинган осийларга, ўзини мусулмон кўрсатган мунофиқларга, Аллоҳга нолойиқ сўзлар айтганларга ва Аллоҳнинг китобидаги ҳақ ва ҳақиқатларни яширган золимларга ишлатилган[2].

Агар оиладаги “эркак” киши ўз аёлини зинода айбласа, лекин унга ўзидан бошқа гувоҳ келтиролмаса, шунда агар ёлғончи бўлсам менга Аллоҳнинг лаънати бўлсин деб ўзини ўзи лаънатлайди. Бундан бошқа ҳолатларда бир мусулмон бошқа бир мусулмонни лаънатлашга, бад дуо қилишга ҳаққи йўқ. бу жуда ҳам оғир гуноҳ ҳисобланади. Қуйида бунга алоқадор ҳадисларни келтирамиз:

“Кимки бир мўмин одамни лаънатласа (бад дуо қилса), гўёки уни ўлдиргандек (гуноҳ) бўлади. Ким бир мўмин одамни куфр ила ҳақорат қилса, гўёки уни ўлдиргандек (гуноҳ) бўлади[3].”

“Бир-бирингизни Аллоҳнинг лаънати, ғазаби ва жаҳаннами билан баддуо қилманглар.[4]

“Мўмин бад дуо қиладиган бўлмайди.[5]

“Мўмин инсон ҳадеб таъна қилаверадиган, бад дуо қилаверадиган, (ёмон сўзлар билан) сўкадиган ҳамда беҳаё бўлмайди.[6]

Мусулмон одамни лаънатлаш ва унга бад дуо қилишдан қайтарган яна кўплаб ҳадислар бор. Бир-бирини лаънатлаш жаҳаннам аҳлининг ишларидандир[7].

Пайғамбар алайҳиссалом яна бир ҳадисда шундай дегани келтирилган:

“Бир-бирингиздан алоқани узманг, ортга ўгириб кетманг, гина сақламанг, ҳасад қилманг. Эй Аллоҳнинг бандалари! Бир мусулмон одам ўзининг дин биродарига уч кундан ортиқ гина сақлаши ҳалол эмас (ҲАРОМДИР)!”[8]

Пайғамбар алайҳиссалом иккита мусулмон одам уч кундан ортиқ гина сақлаб юришини ҳалол эмас деган бўлса, энди биродарига лаънат айтишни бир тасаввур қилиб кўринг. Бу иш мўмин-мусулмонга мутлақо ярашмайдиган ёмон ва разил ишдир.

[1] Муфрадот. Л-а-н моддаси.

[2] Бақара 2/87-88, 89, 159, Оли Имрон 3/87, Моида 5/60, 64, Аҳзоб 33/64, Фатҳ 48/6.

[3] Имом Бухорий ва Муслим ривояти.

[4] Имом Термизий ва Абу Довуд ривояти.

[5] Имом Муслим ривояти.

[6] Имом Термизий ривояти.

[7] Аҳзоб 33/64-68.

[8] Бухорий ва Муслим ривояти.

Телеграм каналимиз: