Musulmonlar
Фатво бериш учун раббоний олимдан дуо олганмисиз?

Фатво бериш учун раббоний олимдан дуо олганмисиз?

Савол: Сиздан фатво сўасам-у, лекин сиз берган фатво нотўғри бўлса, сиз мени азобдан қутқариб қоласизми? Қайси кўзга кўринган раббоний олимлардан дуо ва рухсат олгансиз?

Жавоб: Фатво бериш учун дуо ёки рухсат эмас, илм олиш керак. Сиз иддао этаётган раббоний олимнинг дуо ва рухсатини олгани билан, у одамда илм бўлмаса бари пуч.

Фатвога келсак, берилган фатволардаги оятларни таржималарига тушунмасангиз – шукрки, юртимизда Қуръони Каримнинг бир қанча таржималари бор  – бошқа таржималарга қаранг. Агар ўша таржималарни ўқиб туриб ҳам, берилган фатвони тўғри ёки нотўғри эканини ажрата олмасангиз, айбни фатводан эмас, ўзингиздан ахтаринг.

Шуни ҳам эслатиб ўтмоқчимизки, Қуръондан фақатгина унга ишониб-суянган ва оятларга сўзсиз таслим бўлиб амал қиладиган чин мўминларгина фойда олади (Зорият 51/55, Ясин 36/11). Агар бунга тайёр бўлмасангиз, сизга оятлар билан далил қилиб берилган фатволар ҳам, оятларнинг ўзи ҳам фойда бермайди. Ухлаб қолган инсонни уйғотиш осон, лекин, ўзини ухлаганга солиб олган инсонни уйғотишга уриниш бефойда.

Азобдан қутқариб қолишга келсак, биз инсонларни ўзимизга эргаштирмоқчи эмасмиз, қандайдир диний жамоа ёки мазҳаб ёхуд фирқа ташкиллаштирмоқчи ҳам эмасмиз. Баъзи бир сохта тариқат пирлари каби, биз инсонларни азобдан қутқариб қоламиз деб иддао қилмаймиз. Биз инсонларни Алоҳнинг Китобига – ундаги ҳукмларга чақиряпмиз. Хоҳласангиз фатволарда далил сифатида келтирилган Аллоҳнинг сўзларига амал қилинг, хоҳласангиз амал қилманг. Танлаш ихтиёри ўзингизда. Оятларга амал қилсангиз сизни Аллоҳнинг Ўзи азобдан қутқариб қолади, менсимасдан амал қиламсангиз, сизни азобга Аллоҳнинг Ўзи гирифтор қилади. Эслатиб қўйиш биздан, танлаш ва қарор бериш сиздан.

Фатво бериш ҳақида қўшимча маълумот учун Нисо сурасининг 127- оятига ва изоҳига қаранг. Аслида фатвони Аллоҳ беради.

Телеграм каналимиз: