Аёллар рўзаси
Маълумки, Рамазон рўзаси вояга етган ҳар бир мусулмон эркак ва аёлларга бирдек фарз қилинган (Бақара 2/183). Булардан фақатгина бемор ва сафардаги кишиларга – бошқа кунларда бир кунига бир кун қилиб тутиб бериш шарти билан – рўза тутмаслигига рухсат берилган (Бақара 2/184-185). Рамазонда кундузи фақат уч нарса тақиқланган: емоқ, ичмоқ ва эр-хотин алоқаси. Буларга фақат қуёш ботгандан то субҳи содиқ вақтигача бўлган вақт оралиғида рухсат берилган (Бақара 2/187). Бу оятларга кўра, ейиш, ичиш ва алоқага боғлиқ бўлмаган нарсалар рўзани бузмайди.
Рўза тутиш учун таҳорат ёки ғусл қилган бўлиши шарт эмас. Таҳоратни синиши ёки, уйқуда ёки уйғоқликдаги беихтиёр ғусл қилиш талаб қилинадиган вазият юзага келиши (яъни нопоклик) рўзани бузилишига сабаб бўлмайди. Демак, аёллар ҳам одатли кунларида албатта рўзани давом эттиришлари керак бўлади. Чунки, рўза учун поклик шарт эмас, нопоклик рўзани бузмайди ҳам.
Баъзилар, аёлларни одати бу касалликдир, касалларга эса Аллоҳ кейин соғайганида тутиб беришга рухсат берган, дейиши мумкин. Қани, бу ҳақида Аллоҳ нима дер экан, кўриб чиқамиз. Бақара сурасининг 222-оятида Аллоҳ таоло аёлларни одат кўришини касаллик эмас, балки азият деб билдирган. Рўза тутмасликка эса азият сабаб бўлмайди. Демак, одатли аёллар рўза тутмаслигига оятларда ҳеч қандай рухсат йўқ. Аксинча, эркак ва аёлни ажратмаган ҳолда барчага бирдек рўзани тўлиқ тутишни фарз қилган.
Баъзилар, бу ҳақида бир ривоятга асосланган ҳолда, аёлларга одатли кунларида рўза тутишни тақиқлаб қўйган ва кейин тутиб беради, деб ҳукм қилган. Бунга эса, ўша ривоятдаги «қазо» калимасига тўғри маъно берилмагани сабаб бўлган. Ҳолбуки, «қазо» калимасига Қуръон ва ҳадисларда ибодат ҳақидаги мавзуларда «бир ибодатни ўз вақтида адо этиш», «бир ишни бажариш» деган маъноларда келган (Бақара 2/200, Нисо 4/103, Жума 62/10). Улар эса, бу калимага «кечиктириш» деб маъно беришган.
Бу ерда яна бир масала бор. Баъзи аёллар одат сабабли ўзини ёмон ҳис қилади ва бир-неча кун бемор бўлиб қолади. Айнан ундай аёлларга рўзани бошқа кунларга кечиктиришга рухсат берилади. Лекин, баъзи аёлларга одат келиши ҳеч қандай таъсир қилмайди, доимгидек кунлик ўз юмушларини давом эттираверадилар. Буларга рўзани тутмасликка асло изн берилмайди.
Бундан ташқари, агар аёллар ўша кунларда ўзларини оғир ҳис қилсалар ҳам, Рамазон рўзани тутишлари ўзлари учун яхши бўлади. чунки, Бақара сурасининг 184-оятининг охирида, бемор ёки сафарда бўлса ҳам Рамазон рўзасини тутишлик ўзи учун яхши экани баён қилинган.
Бақара сурасининг 187-ояти сўнгида “Бу Аллоҳнинг қонунидир” деб таъкидлаган. Демак, одатли аёллар рўза тутиб бўлмайди, дейиш Аллоҳнинг рўза ҳақидаги қонунини бузиш бўлади. (Энг тўғрисини Аллоҳ билади)
Бу ҳақида қўшимча маълумот учун қаранг:
Аллоҳ Белгилаб Қўйган Чегараларни Бузилиши ва Буни Рўзадаги Мисоли
Изоҳ қўшиш