Савол:
Ассалому алайкум! Устоз, Қуръонда исми келмаган Пайғамбарлар ҳам борми? Ёки инсониятга юборилган барча пайғамбарлар номи мана шу Қуръонда келтирилганлари халосми? Мени ўйлантирган нарса шуки, Аллоҳ хитойларга, индейсларга ва дунёнинг узоқ жойларидаги инсонларга ҳам ўтмишдаги авлодларидан огоҳлантирувчи пайғамбарлар юборганми?
Ва алайкум ассалом ва роҳматуллоҳ!
Аллоҳ таоло ўтмишдаги ҳар бир миллатга ўзлари орасидан бир огоҳлантирувчи юборгани ҳақида шубҳа йўқ. лекин, кейинчалик худди яҳудий ва христианлар каби улар ҳам ўзларига юборилган пайғамбарни илоҳлаштириб, пайғамбарлари орқали юборилган Илоҳий китобни бузиб-ўзгартириши оқибатида соф ва асл динни ўзгартириб юборишган.
Тарихда турли миллатларга юборилган Пайғамбарлар бўлган, уларнинг барчаси ҳам Қуръонда эсга олинмаган. Бу ҳақида қуйидаги оятдан билиб оламиз:
«Шубҳасизки, сендан олдин ҳам элчилар юборганмиз. Улардан сенга қиссасини айтиб берганларимиз ҳам бор, сенга қиссасини айтиб бермаганларимиз ҳам бор. Ҳеч бир элчи Аллоҳнинг изнисиз оят/аломат келтиролмайди. Аллоҳнинг (азоб ҳақидаги) амри келганида эса, ҳаққоний ҳукм қилинган бўлади ва ўшанда нотўғри ишлар билан машғул бўлганлар хонавайрон бўлади.» (Ғофир сураси 78-оят)
Бу оятга кўра Қуръонда исми келмаган, лекин ўтмишда яшаб ўтган жуда ҳам кўплаб пайғамбарлар бўлган.
Дунёдаги ҳар бир миллатга ўзларининг орасидан ўз тилида гаплашадиган бир пайғамбар ва китоб юборилган.
Бу ҳақидаги қуйидаги оятлардан билиб оламиз:
«Сени ҳақ (китоб) ила ҳам хушхабар берадиган, ҳамда огоҳлантирадиган қилиб юбордик. ўтмишда огоҳлантирувчиси бўлмаган бирорта ҳам уммат йўқ.» (Фотир сураси 24-оят)
«Биз ҳар бир элчини ўз халқи тилида юбордикки, токи улар (рисолатни яширмай ва ўзгартирмай) очиқ-ойдин етказсинлар. Аллоҳ ундан кейин залолатга муносиб бўлганни адаштиради, ҳидоятга муносиб бўлганни ҳидоят қилади. У азиздир, тўғри қарор берувчидир.» (Иброҳим сураси 4-оят)
