Musulmonlar

Жумъа намози Қуръонда айтилганми? У аёлларга ҳам фарзми?

Савол: Қуръонда Жумъа намози ҳақида айтилганми?

Жавоб: Ҳа, Жумъа сурасининг 9-10 оятларида Жумъа намози ҳақида шундай баён қилинган.

“Эй мўминлар, Жумъа кунги намозга чақирилганда, дарҳол Аллоҳнинг зикрига боринглар ва олди-сотдини тўхтатинглар! Агар билсангизлар, мана шу (яъни Аллоҳнинг зикрига ва Жумъа намозини ўқишга шошилиш) ўзларингиз учун яхшироқдир. Намоз адо қилингач, тарқалинглар ва Аллоҳнинг фазлу марҳаматидан истайверинглар. Аллоҳни кўп зикр қилингларки, шояд нажот топасизлар.” (Жумъа 62/9-10)

Ушбу оятда эркак-аёл ажратилмаган. Пайғамбар алайҳиссалом даврида аёллар ҳам Жумъа намозига ва ҳар иккала байрам намозларига ҳам келишган. Кейинчалик аёлларни масжидлардан баъзи бир кишилар тўса бошлашган. Бунга – аёллар эрларини хизматлари билам машғул эканини сабаб қилишган. Лекин, бозорга, маъракаларга, тўй-маросимларга, таъзияларга, мавлидларга, эҳсонларга, 40-51, 72 ва йил маросимларига ва булардан бошқа ҳар қандай маросим тадбирларга боришдан ман қилмаган. Бу жойларга бораётган аёлларнинг барчаси бевами? Ёки юқорида айтиб ўтилган нарсалар Аллоҳ фарз қилган Жумъа ва байрам намозларидан ҳам зарур ва савоблими?

Баъзи кишилар эса бунга жавобан: Аёлларни масжидларга бориши фитна бўлади дейди. Агар уларга қўйиб берса, шаҳарни қоқ ўртасига баланд девор уриб аёлларни бошқа томонга эркакларни бошқа томонга ажратиб юборишади. Шуни унутмайликки, қўлимиздаги мол-мулкларимиз ҳам, аҳли-аёл ва фарзандларимиз ҳам фитнадир, яъни имтиҳон учун берилган омонат ва неъматлардир.

Аллоҳнинг уйидан мўмин ва мўминаларни тўсиш, масжидларда Аллоҳни зикрига монеъ бўлишдан кўра каттароқ фитна борми?!