Ассалому алайкум. Ақиқа масаласи ҳақида тушунтириб берсангизлар. Ақиқа қанчалик зарур? Қилиш ёки қилмаслик ихтиёри ҳақида тушунтириб берсанглар илтимос. Олдиндан раҳмат.
Ва алейкум ассалом.
Ақиқа – фарзанд неъматига шукр қилиб, Аллоҳнинг розилигига эришиш мақсадида Аллоҳ учун кесиладиган қурбонликдир. Қуръони Каримда Аъроф сурасининг 189-ояти бунга ишорат қилади:
“…Эр аёлга қўшилганида аёл енгил ҳомиладор бўлиб, уни (бир муддат) ташиб юради. Юки оғирлашганида иккаласи ҳам Робби – Аллоҳга дуо қилиб: “Агар бизга яхши фарзанд берсанг, шукр қилувчи (вазифасини адо этувчи)лардан бўламиз”, дейди.”
Ота-оналар фарзанд кўрганида бирон бир жонлик ҳайвон сўйиб қурбонлик қилиш Исломда бир шукроналик тимсолига айланиб қолган.
Бу амал Пайғамбар алайҳиссаломдан бизгача давом этиб келган суннат амал ҳисобланади. Чунки, ўзи ҳам набиралари Имом Ҳасан ва Ҳусайнлар учун қурбонлиқ кесган[1] Бу ҳақида кўплаб ривоятлар бор[2].
Ақиқа қилиб қурбонлик кесишни туғилганидан еттинчи куни нишонланиши, айнан ўша куни сочини олдириши ва ном қўйилиши Пайғамбар алайҳиссалом тарафидан тавсия қилинган[3].
[1] Имом Насоий ривояти, 7/164.
[2] Бухорий, Термизий, Насоий, Имом Аҳмад ва бошқалар ривоятларида келтиришган.
[3] Бухорий, Термизий, Насоий, Таҳовий ва Байҳақийлар ривоят қилган.
