Савол: Жаннатда ҳам бу дунёдаги оила-аъзоларимиз билан бирга бўлишимиз мумкинми?
Жавоб: Жаннатга киришга муносиб бўлганлар у ерга оталари, жуфтлари ва фарзандлари билан бирга кириши мумкинлиги ҳақида оятларда баён қилинган. Алоқадор оят шундай:
“(Эй, Муҳаммад,) ахир, Сизга Раббингиз томонидан нозил қилинган нарса аниқ ҳақиқат эканини биладиган киши (қалб кўзи) кўр кимсага ўхшайдими? (Бу оятлардан) фақат ақл эгаларигина эслатма олурлар. Улар Аллоҳга берган аҳдларига вафо қиладиган ва мийсоқ (ваъда)ни бузмайдиганлардир. Улар Аллоҳ боғланишга буюрган нарсаларни (яъни, қариндошлар билан алоқани) боғлайдилар, Парвардигорларидан қўрқадилар ва ҳисоб-китобнинг нохуш бўлишидан чўчийдилар. Парвардигорларининг “юзини” истаб, (турли машаққатларга) сабр қилиб, намозларини тўкис адо этган ва Биз ризқ қилиб берган нарсалардан хуфёна ва ошкора эҳсон қилган ҳамда ёмонликка яхшилик қайтарадиган зотлар – айнан ўшалар учун охират диёри (бордир). (У абадий) туриладиган жаннатлар бўлиб, (улар) у жойларга ота-боболари, жуфти ҳалоллари ва зурриётларидан иборат солиҳ (банда)лар билан бирга кирурлар. Сўнг уларнинг ҳузурларига ҳар (бир) эшикдан фаришталар кириб (дерлар): “(Аллоҳ йўлида турли машаққатларга) сабр қилиб ўтганларингиз сабабли (энди бу ерда) сизларга тинчлик бўлгай. Охират диёри нақадар яхши!” (Раъд 13/19-24. Шайх Абдулазиз Мансур тажимаси)
Жаннатга кирган ҳар кимнинг ёмон одатлари, нафрат ва ҳасадгўйлиги, қизғончиқлик ва ғиллу ғашликлари олиб ташланган бўлади.
“Биз уларни кўнглидаги ёмон хусусиятларни суғуриб ташлаймиз, уларни ост тарафларидан анҳорлар оқиб туради ва улар шундай дейишади: “Бизни бунга муваффақ қилган Аллоҳ ҳар ишни чиройли қилади, агар Аллоҳ бизга бу йўлни кўрсатмаса эди, биз уни ўзимиз топа олмаган бўлардик. Роббимизнинг элчилари ҳақиқатда тўғри нарса олиб келишган.” Уларга: “Мана сизга жаннат! Сизлар қилган амалларингиз эвазига унга эга бўлдингиз”, деб нидо қилинади.” (Аъроф 7/43)
“У (ер)га соғ-саломат, тинч-омон киринглар” (дейилур). Биз (жаннатдаги) сўриларда биродарона, бир-бирларига рўбарў ўтирганларнинг дилларидаги гина(-кудуратлар)ни чиқариб ташлаймиз. У жойда уларга чарчоқ етмас ва улар у жойдан чиқарилувчи ҳам эмаслар!” (Ҳижр 15/46-48)
Жаннатга кирган аёллар у ердаги ҳурлар билан таққослаш мумкин бўлмаган даражада гўзал ва латофатли бўладилар. Дунёда уларни ўхшатиб бўлмаслиги учун, Аллоҳ таоло улар ҳақида шундай марҳамат қилган:
“Орангизда ўлим ўлчовини Биз белгиладик, Биздан ўзиб кетилмас. Бу кўринишингизни ўзгартириб, сизлар билмайдиган бир шаклда (гўзал суратда) янгитдан яратишга ҳам (ожиз эмасмиз).” (Воқеа 56/60-61)
“Улардан (бу вужудларидан) яхшироғи билан алмаштириб қўйишга (қодирмиз). Биз бу ишни қилишдан жиз эмасмиз.” (Маориж 70/41)
Бу нарсалар эркак кишилар учун ҳам бўлади. Лекин қуйидаги оятлар фақат аёллар ҳақида:
“Биз уларни ўзгача бир шаклда яратамиз. Бокира ҳолатга келтириладилар; улар эрларини севадилар ва бир хил ёшда бўладилар.” (Воқеа 56/35-37)
Аллоҳ таоло ҳаммамизни жаннатда оила-аъзоларимиз билан бирга қолишни насиб этсин. Ҳақиқий бахт-саодат ана шу ерда.
