Musulmonlar

Qur’onda buzg’unchi-terrorchining jazosi

Савол: Террористларни жазоси Қуръонда борми? Уларни қилаётган бузғунчиликларига қарши қандай жазо берилиши керак?

Жавоб: Ҳа, албатта бор. Ундай инсонларни Аллоҳ таоло Қуръони Каримда фасодчи/бузғунчи деб номлаган. Бу ҳақда Моида сурасининг 33-оятида Аллоҳ таоло шундай марҳамат қилади:

إِنَّمَا جَزَاءُ الَّذِينَ يُحَارِبُونَ اللَّـهَ وَرَسُولَهُ وَيَسْعَوْنَ فِي الْأَرْضِ فَسَادًا أَن يُقَتَّلُوا أَوْ يُصَلَّبُوا أَوْ تُقَطَّعَ أَيْدِيهِمْ وَأَرْجُلُهُم مِّنْ خِلَافٍ أَوْ يُنفَوْا مِنَ الْأَرْضِ ۚ ذَٰلِكَ لَهُمْ خِزْيٌ فِي الدُّنْيَا ۖ وَلَهُمْ فِي الْآخِرَةِ عَذَابٌ عَظِيمٌ

“Ер юзида бузғунчилик қилиб Аллоҳ ва Росулига қарши жанг қилаётганларнинг жазоси – ё уларни ўлдирилиши, ёки осилиши, ёки қўл-оёқларини қарама-қарши ҳолатда кесиб ташланиши, ёки ўша ердан сургун қилинишидир. Бу жазо улар учун бу дунёда хорликдир, охиратда эса, уларга алоҳида катта бир қийновли азоб бордир.”

Бу оятда 4 хил жазо белгиланган. Агар террорчилар одам ўлдирган бўлса улар ҳам ўлдирилади ёки осилади. Агар бировни молига тажовуз қилган ҳолда мол-мулкини куч билан тортиб олган бўлса ёки яширинча ўғирлаб олган бўлса қўллари кесилади. Агар на моддий ва на жисмоний зарар етказмаган бўлса, лекин инсонларни хотиржамлигини бузган, ўша ерларда тинчликка рахна солган, халқ орасига қўрқув солган бўлсалар уларни у ерлардан сургун қилинади.

Аллоҳ ва Росули буюрмаган ишларни Аллоҳ ва Росулини номидан деб уйда ўтирган бегуноҳ инсонларга бўмба ташлаш, Ислом шу деб ҳайқириб мантиқсиз ва ақлсиз ҳолатда автобусларни ёқиб ташлаш, халқ орасида қўрқув ва нафрат уйғотадиган бузғунчи ҳаракатлар қилиш, бировга адовати бўлмаган бегуноҳларни ушлаган жойида қўл-аёғини боғлаб калласини узиб ташлаб ижтимоий тармоқларда қилган фисқу фасодини мақтаниш, бегуноҳ аёл-қизларни сен душман тарафидасан деб уларни чўрилаштириш ёки бир матоҳ сифатида фойдаланиб сотиб юбориш, нафсу ҳаволари ва ўз орзу-истаклари йўлида Аллоҳнинг оятларини бузиб ва оятларни алоқадор оятлар билан бирга ўқимасдан, бир оятни бўлиб-парчалаб ўз орзу-ҳавасига кўра таъвил қилиб олиб бузғунчилик қилаётганлар – ана ўшалар Аллоҳ ва Росулига қарши уруш очганлар ҳисобланади.

Ўзларини Аллоҳ ва Росулини буйруқларини бажаряпмиз деб бонг уриб мақтанаётган ИШИД, аслида Аллоҳ ва Росулига, Ислом динига ва мусулмончиликка қарши уруш очганлар дейилади. Чунки улар бамисоли кимларнингдир палахмонида қўлланилаётган тошлардирки, у тошлар билан бир қанча бегуноҳ қушлар уриб туширилиши кўзланган бўлиши мумкин. Аллоҳнинг динида ноҳақ одам ўлдириш, тинч ва осуда улкаларни хонавайрон қилиш, бир халқни бошига йиллардир ўзига қайтиб кела олмайдиган даражада кулфат олиб келиш, кимни қаерда тутиб олса ўша заҳоти қўл-оёғини боғлаб бошини узиб ташлаш каби ваҳшийликлар уёғда турсин, ҳатто бекордан-бекор бировни дилига озор бериш  Исломда йўқ. Мусулмон – бошқа инсонлар уни тилидан ва қўлидан саломат қолган кишидир. Мўмин – инсонлар унга молини ва жонини ишониб топширган кишидир. Қани энди ИШИДга ким нимасини ишониб топширади-ю ким уларни тилидан ва қўлидан зарар кўрмади. Ер юзида ИШИДдан зарар кўрмаган инсон қолмади десак муболаға бўлмайди. Энди оятни давомига келсак, кейинги оятда Аллоҳ таоло шундай марҳамат қилади:

                    إِلَّا الَّذِينَ تَابُوا مِن قَبْلِ أَن تَقْدِرُوا عَلَيْهِمْ ۖ فَاعْلَمُوا أَنَّ اللَّـهَ غَفُورٌ رَّحِيمٌ

“Магар, уларни қўлга олишингиздан аввал ўзлари тавба қилиб қайтсалар, билинки, Аллоҳ кечиримли ва марҳаматлидир.” (Моида 5/34)

Демак, террорчилар қўлга олинишидан аввал ўзлари айбларини тан олиб таслим бўлсалар, давлатга ва халққа етказган ҳар қандай зарарни ўрнини қопласалар, қилган ишлари ва тутган йўллари хато эканини тан олсалар, уларни айби Аллоҳ таоло тарафидан кечирилади.

Улар ўзларини Аллоҳ ва Росулини йўлида юрган мужоҳидлармиз, деб даъво қилишади. Лекин улар айтаётган жиҳод Аллоҳнинг Китобида ва Росулуллоҳнинг ҳаётида асло йўқ. Бундай бузғунчи ва ахлоқсиз дин асло Аллоҳнинг дини бўлиши мумкин эмас. Улар жиҳод билан қитол, яъни қонли уруш деган нарсани бир-биридан ажрата олмаганлиги ва Аллоҳнинг китобидан узоқ бўлишгани сабабли, жуда катта ва оғир жиноятларга қўл уришди. Аллоҳнинг тавба эшиклари ҳар доим очиқ. Аллоҳ – адолатсизлик, зўравонлик, ҳақсизлик, ҳаёсизлик ва фисқ-фасодни асло севмайди ҳам ундай ишларга буюрмайди ҳам. Аллоҳ фақатгина яхшиликка, тинчликка бирлик ва баробарликка буюради (Наҳл 16/90).

Бу ҳақда қўшимча маълумот олмоқчи бўлганлар қуйидаги линкга мурожаат қилишлари мумкин:

https://www.facebook.com/Musulmonlar/videos/1908459849218458/?modal=admin_todo_tour

Bizni Kuzating

%d bloggers like this: